يمكن هبتدى كلامى بدا .. المانيا ثم المانيا ثم المانيا
اشمعنى يا عم المانيا ؟ .. شوف .. مع نهاية الحرب العالميه التانيه و سقوط الرايخ بدأ الحلفاء يلموا غنايم النصر .. يمكن البريطانيين و الفرنسيين ركزوا فى الاسلحه الالمانيه بعكس الروس و الامريكان و اللى عينهم كانت على العلماء الالمان نفسهم .. ليه العلماء الالمان ؟ .. لان العلماء الالمان وصلوا لدرجة علميه و تكنولوجيه ملفته خصوصا فى مجال الصواريخ بعد ما اوروبا كلها اتجننت بصواريخ فى 1 و فى 2 .. اخد الامريكان و السوفييت العلماء الالمان دول و بدأوا يدوهم امتيازات و يشغلوهم لحسابهم و يديروا مشاريع خاصه بيهم .. و لما بدأت الحرب الباردة بين الطرفين كان كل طرف بيحاول يفرد عضلاته على التانى فى كل المجالات و اللى كان منهم سباق الفضاء .
و فى اكتوبر 1957 بدء سباق الفضاء فعليا و اللى افتتحه الاتحاد السوفيتى و قص الشريط باطلاق اول قمر صناعى “سبوتنيك 1” .. الخبر دا عمل هزه كبيره فى امريكا لان اللى يقدر يوصل للفضاء يقدر يسيطر على الارض و بدأ الامريكان بتسخير كل امكانياتهم العلميه و الماديه لمنافسة الروس فى المجال دا .. و يمكن من هنا بدأت وكالة ناسا لابحاث الفضاء فى الانشاء و التكوين و بعد اربع شهور رد الامريكان عليهم باطلاق اول قمر صناعى امريكى و كان اسمه “ديسكفرى 1 ” .
هل الموضوع يقف على كدا ؟ .. ابسلوتلى .. السوفيت قالوا عاوزين نطلع بقى كائنات حيه للفضاء .. يمكن الامريكان كانوا بدأوا قبل كدا الموضوع دا بشكل بدائى انهم طلعوا ذباب الفاكهه على متن صاروخ المانى V2 و اللى كان ذات ارتفاع محدود .. لكن البدايه الحقيقيه كانت مع طلوع الكلبة لايكا السوفيتيه للفضاء و رجعوها للارض ” و يقال انها ماتت بعدها بفترة لشعورها بالاجهاد ” .. الامريكان قالوا الكلام دا مينفعش و راحوا جايبين 3 شمبانزى وصايه من افريقيا و طلعوهم الفضاء و نزلوهم تانى و بصوا للروش بسخريه و اى خدمه .
الروس شالوا الموضوع دا فى قلبهم .. راحوا مطلعين اول انسان بشرى للفضاء و هو “يورى جاجارين” و اللى طلع على متن مركبة الفضاء “فوستيك 1 ” .. و بصوا للامريكان تقدر تعملها دى .. راح الامريكان ردوا بعدها بتلات اسابيع مطلعين اول رائد فضاء امريكى و كان اسمه “الن شيبرد” و اللى طلع فى رحله فضائيه بدوران
فرعى لمدة ربع ساعه و نزل الارض و مستنوش و راح الامريكان مدينهم واحدة كمان يا زلفى برائد فضاء امريكى جديد اسمه “جون جلين” و اللى عمل دورة كامله حوالين الارض من الفضاء .. الروس دمهم اتحرق و راحوا رادين الصاع صاعين و مطلعين اول رائدة فضاء و هى “فالنتينا تيريشكوفا” و طلعوا رائد فضاء تانى اسمه “اليكسى ليونوف” و اللى كان اول واحد يسبح فى الفضاء و اللى كان هيروح فى ستين داهيه ساعتها لولا ان ربنا ستر لانه لما خرج مكانشى عارف يرجع للكبسوله تانى .
طبعا بعد ما الاتنين قدموا اقصى ما عندهم فى الفضاء و الدوران حوالين الارض بدأوا يبصوا لبعض و يبصوا للقمر .. و بدء سباق جديد للوصول لسطح القمر و ابتدى الطرفين يبعتوا مسابير لاستكشافه عشان يبتدوا يحطوا الرحال عليه .. يمكن الامريكان تفوقوا على الروس فى الجزئيه دى لان مسابيرهم اعطت نتائج دقيقه عن سطح القمر و دا اللى سهل عمل رواد الفضاء فى برنامج ابوللو و اللى منه نزل رائد الفضاء “نيل ارمسترونج” و حط رجله كأول بشرى على سطح القمر ” كنت كتبت عن الجزئيه دى قبل كدا بالتفصيل ” .. المهم فضل السباق مستمر الى ان تحالف الامريكان و السوفيت فى برنامج فضائى واحد اسمه ” ابوللوو – سويوز ” و كان فى سنه 1975 و لما التحمت مركبة الفضاء السوفيتيه سويوز مع مركبة الفضاء ابوللو و اتقابل رواد الفضاء من الطرفين سلموا على بعض كبدايه مرحلة جديدة للتعاون الامريكى و السوفيتى فى المجال دا و بدأوا يشاركوا بعض فى الابحاث الفضائيه سوا .. و استمر الوضع المشترك دا بين الاتنين الى ان اقام الاتحاد السوفيتى بمفرده محطة الفضاء “مير” و نتيجة لضعف التمويل للصيانه و الاشراف على البرنامج دا و الظروف الاقتصاديه اللى مر بيها الاتحاد السوفيتى و انهياره تم اسقاطها و مشاركة الولايات المتحده و اوربا فى بناء محطة الفضاء الدوليه الـ ISS و اللى لازالت شغاله و موجوده لغاية دلوقتى .
دا ملخص بسيط لسباق الفضاء السوفيتى – الامريكى .. يمكن و انا بكتب الموضوع دا بدأت افكر احنا فين من وسط دا .. مجاش فى بالى الا حاجتين الصراحه اولها مشهد يونس شلبى و هو بيهز فى دماغه فى مسرحية العيال كبرت و هو قاعد يتفرج على سباق الفضاء دا و الحاجه التانيه هى اغنية ياما القمر على الباب .. يبقى صحيح هنوجع دماغنا و نطلع له ليه .
