فيلم The Day After كنت كتبت عنه نبذه بسيطة الاسبوع اللى فات انه اصاب الرئيس ريجان بالاكتئاب لما شافه و هيئة الاركان المشتركة تنحت من احداثه حتى قيادات الاتحاد السوفيتى نفسهم لما شافوه اترعبوا و كان ليه تأثير جامد فى توقيع الطرفين لاتفاقية الحد من الانتشار النووى بين ريجان و جورباتشوف .
الفيلم دا بيحكى سيناريو من رأيي انه محكم جدا لكيفية ترتيب اشتعال حرب عالميه تالته بين الامريكان و السوفييت .. مبدأيا الفيلم درامى و خيالى مش حربى يعنى مش هتشوف الحرب لكن هتتابع تفاصيلها خلال مشاهد الفيلم و انت بتسمعها مع الابطال فى نشرات الاخبار او تقراها فى الصحف و بعدها تشوف الكلام دا ادى لايه فى الاخر و اللى كان تبادل اطلاق الصواريخ النوويه على البلدين و ايه اللى هيحصل للشعب الامريكى ساعتها و بعدها .
بص يا ريس .. الفيلم تقدر تقول انه متقسم لتلات اجزاء .. الجزء الاول درامى و هتحس انه ممل بيحكى مجموعة قصص مختلفه لاسر امريكيه عايشه حياتها بشكل طبيعى جاك بيحب ساندرا و عبده ببيحب حنيفه و الدكتور خشبه زعلان ان بنته هتسيبه و تتنقل تعيش فى ولاية تانيه و بيتخللها اجزاء من مشاهد فى معسكرات للجيش المتواجد فيها الاسلحه الامريكيه يعنى حاجات متلزمكش و حياه روتينيه جدا .. احداث الفيلم بتبتدى تسخن مع تصاعد الاحداث ووصول الحرب لليفيل النووى بدء يديك مشاهد من قلب القواعد العسكريه فكيفية تعامل الجيش الامريكى فى تنفيذ الضربه النوويه على السوفييت عن طريق الصواريخ الباليستيه و قاذافات القنابل .. و الفيلم مش بيحدد مين بالظبط اللى بدء الضربه النوويه على التانى لكن انت هتشوف الامريكان بيضربوا و السوفيت بيردوا التحيه و شكل الولايات المتحدة هيبقى عامل ازاى اول ما تستقبل الصواريخ النوويه دى .. بعدها يبدء الجزء التالت و يرجعنا لنفس القصص اللى بدء بيها الفيلم و يوريك حياة الشخصيات دى هتبقى ازاى و اللى هتبقى مأساه من موت بالاشعاع او بالفوضى اللى هتجتاح الولايات المتحدة و اللى بتنتهى بوقف اطلاق النار بين الجانبين بعد خراب مالطا فى الولايات المتحدة و موسكو .
اكتر عجبتنى فى الفيلم سيناريو الحرب ازاى بدء .. بدء بأن الاتحاد السوفيتى عمل حشود عسكريه فى المانيا الشرقيه و قال دى مناورات لحلف وارسو بغرض انه يخوف الامريكان و الغرب و يحاول يدفعهم انهم ينسحبوا من برلين الغربيه .. الامريكان من ناحيتهم مجابوش ورا فبدأ السوفييت يبعتوا دبابات للحدود بين المانيا الشرقيه و الغربيه فى الوقت اللى بدء يتداول انباء بحدوث تمرد داخل وحدات للجيش التابع لالمانيا الشرقيه و اللى قمعها الجيش السوفيتى و بدء يطوق برلين الغربيه .. امريكا وجهت انذار ان السوفييت لازم يتراجعوا عن الحصار اللى فارضينه دا و ادامهم لغاية 6 الصبح و لو ما اتراجعوش دا يعتبر اعلان حرب .. السوفيت قالولهم حمرا .. رئيس الولايات المتحدة اعلن حالة التأهب القصوى لكل وحدات الجيش الامريكى فى العالم كله للحاله ” ديفكون 2 ” .. و صدرت الاوامر للجيش الامريكى و حلف الناتو باجتياح برلين الشرقيه .. بمجرد محاولة الناتو دخول برلين الشرقيه السوفييت مسكوهم نفخوهم و عبرت طيارتين ميج 25 لالمانيا الغربيه و ضربت منشئات عسكريه تابعه للناتو و كمان مدنيه .. دا غير اندلاع معارك بحريه بين الطرفين فى الخليج العربى و اللى غرقوا سفن لبعض .. و خرجت تقارير غير مؤكدة انه تم استخدام السلاح النووى فى فيسبادن وفرانكفورت و بدء الجيش السوفيتى يتقدم و يجتاح المانيا كلها و بدء يوصل للحدود الفرنسيه وسط تراجع من قوات الناتو ” حلف خيخه ” .. الولايات المتحدة لمحاولة ايقاف التقدم الروسى ضربت تلات قنابل نووية تكتيكيه منخفضة التأثير على اجزاء من القوات دى .. السوفيت ردوا بقصف مقر الناتو فى بروكسل بقنبلة نوويه .. امريكا دفعت بقاذفات القنابل المحمله B52 لميدان المعركه و السوفيت ردوا بغارات جويه على قواعد عسكريه فى انجلترا .. الرئيس الامريكى ادى امر بضرب الاتحاد السوفيتى نفسه بالصواريخ النوويه و بعد الامر دا و فى خلال دقايق انطلق 1000 صاروخ من الاراضى الامريكيه و متجه على هناك و بعد ما الصواريخ انطلقت بدء يوصل للقواعد الامريكيه دى ان جايلهم صواريخ من الاتحاد السوفيتى .. الصواريخ وصلت و بوووووم .. و يبدء الجزء التالت او المأساه بقى .
عموما الفيلم ظريف مشكلته انه مش واخد شهره كبيره اوى عندنا عشان كدا محدش ترجمه و النسخ المتوفرة باللغه الانجليزيه .
