السلاح النووى يعتبر واحد من الاسلحه الغير تقليديه حتى العسكريين بيسموه سلاح ردع .. بمعنى .. حاجه زى بوليصة التأمين يعنى انا مش هستخدمه لكن لو فكرت فى يوم انك تكون مصدر خطورة عليا هجيب عاليها واطيها .. فأكيد هتفكر مليون مرة قبل ما تبتدى تهجم عليهم او تحاربه .. و يمكن دا يوضح ليك ليه الدول العظمى لما يبقى بينهم و بين بعض صدام عمرهم ما يحاربوا بشكل مباشر و يسيبوا الصبيان بتوعهم يحاربوا بعض .. لأن لو حصل الصدام بينهم وواحد فيهم حس ان هزيمته قربت هيوصل لمرحلة استخدام السلاح النووى و عليا و على اعدائى .
بدء التفكير فى السلاح النووى فى داخل الولايات المتحدة تحت اشراف عقليه فذه من اصول المانيه ” اوبنهايمر او زى ما بيسموه ابو القنبلة الذريه ” تحت مشروع يسمى مشروع مانهاتن و اللى عن طريقه تم تفجير اول قنبله ذريه فى صحراء نيوميكسيكو سنة 1945 .. و كانت مكونات التجربه يعنى زى الشيف الشربينى ما بيقول ورقه و قلم يا ست الكل .. 600 ميلليجرام من اليورانيوم او البلوتونيوم المخصب و معاهم قنبلة تقليدية من الـ TNT تعمل انشطار نووى متسلسل للعنصر دا و اللى بينتج عنه حرارة رهيبه و هوووب دابل كيك تاخد احلى قنبله نوويه تمسح لك مدن من على الخريطة .. و دا اللى حصل فعلا و طبقوه بشكل عملى لما الولايات المتحدة القت القنبلتين الذريتين على هيروشيما و ناجازاكى ” الولد الصغير و الرجل السمين ” و عملوا اضرار كارثيه فى المدينتين دول .. مع الفارق ان قنبلة هيروشيما كانت معتمدة على اليورانيوم اما نجازاكى كانت على البلوتونيوم .
و بعد القاء القنبلة الذريه اصبحت الولايات المتحده هى اللى ليها الحق الحصرى فى امتلاك الاسلحه المخيفه دى .. الاتحاد السوفيتى كان هيتجنن و يجيبها و فعلا قدر عملاءه انهم يرسلوا التصميمات الكامله للقنبله الذريه و بقى الاتحاد السوفيتى قوة عظمى نوويه مكافئه للولايات المتحدة بتفجيره مع اول تجربه ناجحه لتفجير نووى فى كازاخستان .. الامريكان اتفاجئوا بالتفجير دا و دمهم اتحرق فعلا لان هيمنتهم كدا هتضيع .. بس تعاملوا مع الموضوع بسياسه حكيمة و كان اول خطوة اخدوها انهم نقلوا سلطات التحكم فى الاسلحه النوويه من البنتاجون للجنه اسمها الطاقة الذريه تحسبا ان اى جنرال تاخده الحماسه اوى و يضرب نووى على السوفييت و فى نفس الوقت بدأوا يدعموا حلفائهم الغربيين و ساعدوا بريطانيا و فرنسا فى امتلاك السلاح دا كحائط صد دفاعى اوروبى للاتحاد السوفيتى .. الاتحاد السوفيتى يسكت ؟ .. ابدا .. دا بدأ يطور فى السلاح النووى كمان و كانت مع تصنيع الصواريخ العابره للقارات و اللى ممكن يتحط عليها راس نووى و دا جنن الامريكان اكتر و بدأوا هما كمان يبتدوا يطوروا صواريخ مضاده و استمرت الحرب الباردة بينهم و اللى كانت هتوصل لصدام نووى مباشر بسبب ازمة الصواريخ الكوبيه ” كنا اتكلمنا عنها قبل كدا ” .
طيب وا حد يسألنى ايه انواع السلاح النووى ؟ .. شوف يا سيدى .
اول نوع و هو الانشطارى و دا بيبقى عبارة عن انشطار عنصر تقيل زى اليوارنيوم او البلوتونيوم .. ببساطه كدا انت تجيب نيوترون تخليه يضرب نواة العنصر المخصب دا بالروسيه يجيبله ارتجاج فى المخ و يبتدى ينقسم و ينشطر لمجموعه جديدة من النيوترونات و الانويه و تبتدى النيترونات الجديدة دى تخبط فى الانويه الجديدة و هكذا بشكل متسلسل و مع كل روسيه بتنتج درجة حرارة رهيبه جدا بتبقى هى المسئولة عن التدمير فلك ان تتخيل بقى .
النوع التانى و هو الاندماجى و دا مصيبه عن الانشطارى لان الناتج الحرارى بتاعها اكبر بكتير منها .. و هى بتتم بعمليه عكسيه .. بمعنى بدل ما اشطر النواه .. لأ انا اجيب انويه عناصر خفيفه زى الديوتيروم و الليثيوم و ادمجهم فى بعض .. زيتهم فى دقيقهم يعنى .. عشان يكونوا عنصر اتقل .. و فى خلال عملية الاندماج بتنتج درجة الحرارة المطلوبة فى التدمير .. و دى اللى بيطلق عليها القنابل الهيدروجنييه .
اما النوع التالت فاسمه القنابل النوويه التجميعيه .. و فعلا اعذرونى فى شرحه لانى فعلا مش مستوعبه اللهم انك تجيب عنصرين و توصلهم لحاجه اسمها الكتله الحرجه و اللى منها بتوصل لدرجة حرارة التدمير .. لكن الميكانيزم بتاعها مش فاهمه زى اللى قبله و من قال لا اعلم فقد افتى .السلاح النووى خطورته فى تلات مراحل .. اول حاجه الموجه الانفجاريه و بتبقى كبيرة جدا .. و لو ربنا وفقك و نجاك منها .. هتخش على المرحله التانيه و هى مرحلة الناتج الحرارى من الانشطار يعنى لو مموتش منفجر هتموت محروق .. طب لو طلع جلدك تخين و محصلش لا دا و لا دا .. هتخش على المرحله التالته و هى الاضرار الاشعاعيه اللى بتؤدى لتدمير البيئة المحيطه اما لحدوث تسمم فى الاراضى او الانهار او حتى اصابة البشر بأمراض مؤذيه زى السرطانات .
طيب لو انا عاوز استعمل النووى ايه الاسلحه اللى ممكن تساعدنى فى استخدامه ؟ .اول حاجه انت ممكن تحطها على قنبله .. يعنى تحملها على طيارة و ترميها من فوق و سيرى يا نورماندى مجراكى و مرساكى و الجاذبيه تقوم باللازم و بوووم و شكرا .. الحاجه التانيه عن طريق الصواريخ .. يعنى سيادتك تجيب صاروخ حلو كدا على حسب نوعه طويل المدى او متوسط او قصير و تشيل راسه و تحط مكانه راس نووى .. و توجهه على المكان اللى انت عاوزه و احلى تحيه للعروسين .. و فيه عن طريق المدافع بس دى منطقيا صعبه شويه .
طب ايه الدول اللى عندها اسلحه نوويه ؟الخمسه الكبار طبعا .. امريكا و روسيا و الصين و انجلترا و فرنسا و دول اعلنوا بشكل رسمى عن طريق تجاربهم و الجدع يورينى نفسه .. يضاف اليهم الهند و باكستان و اللى اعلنوا هما كمان بشكل رسمى لكن من غير ما يوروا العالم اى تجارب نوويه حقيقيه .. اما اسرائيل ففيه شكوك ان عندها نووى لكن الحكومات بتاعتهم مش راضيه تعلن بشكل رسمى .. اما كوريا الشماليه فيقال انها بدأت تمتلك السلاح النووى بالفعل .. و يقال ان جنوب افريقيا كان عندها اسلحه نوويه لكن تخلصت منها .
يعنى دى نبذة بسيطة عن الاسلحه النوويه و تاريخها و لو هتسمحوا لى انى اعقب فممكن اقول كذا نقطة سريعه كدا .
– اول نقطه .. خلونا نتكلم بواقعيه احنا مش فى عالم مثالى و لازم عشان تقدر تعيش فيه و تحمى بلادك لازم تحط التسليح و ميزانيته فى الاعتبار ان مكانش يمكن ليه الاولويه كمان .. احنا عايشين فى غابه .. ايوة متفهم طبعا ان التعليم و الصحه و كل دا شئ مهم .. لكن معلش لو واحد حرامى هجم عليك و ثبتك بسلاح انت ملزم تدافع عن نفسك و عن اللى معاك مش هتتكلم معاه علم و ثقافه و تعليم و لا هتستعرض صحتك و عضلاتك عشان يرتدع .. و اسف و الله بس دا العالم بتاعنا كدا .. اسرائيل و تركيا بيبلطجوا على لبنان و قبرص عشان الغاز و محدش يجروء انه يقرب من الحقول بتاعتنا عشان النقطة دى .
– تانى حاجه .. هل مصر عندها نووى ؟ .. اعتقد لأ لكن بالتأكيد عندنا كيماوى و بيولوجى .. النوع دا بيقولوا عليه نووى الفقراء .. يعنى من وجهة نظرى .. انا شايف ان امتلاك اسرائيل للنووى دا شئ خطير لكن عندنا المضاد ليه و لو هما هيموتونا محروقين بالنووى احنا هنموتهم جربانين بالبيولوجى .. و على رأى القرموطى خالصين .
– النقطة الحقيقيه المحيرة ليا فى الموضوع دا .. الضمير .. يعنى الناس اللى اخترعوا القنبلة النوويه دى احساسهم كان ايه لما شافوا صور اختراعهم و هى مسببه العدد المهول دا من القتلى و التخريب .. هتقول احنا فى حالة حرب .. بصراحه غير مقنعه ليا لان اغلب اللى مات مدنيين .. فيبقى السؤال هل ممكن الطموح العلمى يخليك تتنازل عن انسانيتك ؟ .. سؤال بدون اى اجابه عندى الصراحه .
